風雲II The Storm Warriors II --- 彭氏兄弟 敗也風雲

       簡單一句,如果你係風雲漫畫迷就咪鬼睇,我好彩睇DVD,睇完真係嘔血.成套戲拍到好似<戰狼300>,用上大量CG,最離譜係幾十個大漢抬絕無神出場,簡直一模一樣.而且CG作用都係幫助套戲啲景攪到好似山水畫,啲動作場面悶到爆.唯獨步驚雲嗰招劍流雲效果幾好.


       講起步驚雲,早第一集都覺得郭富城唔啱做步驚雲,步驚雲昂藏六呎,郭富城個子矮而且有陽光氣息,根本做唔到「不哭死神」嘅神髓,至於鄭伊健做聶風就幾似(起碼好個趙文卓).


       彭氏兄弟拍風雲II就暴露咗佢哋唔識拍武打動作片,之前套<無聲火2.0>已經瀨嘢(據聞08年美國連試映都冇).        
    
       睇佢地見多幾次鬼好過.



 

風雲 II 主题曲MV 《風雲義》

Clash of the Titans 人‧神‧魔戰

       <人‧神‧魔戰>是講希臘神話英雄Persues的故事,亦是男主角森禾霍頓(Sam Worthington)的第二套3D電影,第一套就係阿凡達,但係呢套3D真係不敢恭維,成套戲最3D就係字幕和片頭演員導演等介紹, 套戲衹係不過不失,動作場面只有中段大戰幾隻巨型蝎子有睇頭,片未打遠古海怪就麻麻, 奈何要跟原著神話冇辨法.

       最好笑係里安尼遜(Liam Neeson)個造型成個聖鬥士星矢,而蛇髮女妖美杜莎啲CG又一般, 我寧願睇奧瑪花曼(Uma Thurman)做,索好多 !!

The Road --- 2012後的世界

       < The Road >是由域高摩天臣(Viggo Mortensen)主演,佢做完魔戒亞拉岡之後拍左幾套唔同種類既戲,有大學教授、卧底、騎師等,雖然除左魔戒冇邊套大收,但佢既演技係不容置疑.今次做一個爸爸教嗰仔點喺一個飽受天災既世界生存,叫佢唔好信任何人,唔好分嘢比人食,點樣生存,重教佢用槍,遇到食人族時為左唔使受痛苦而自殺.
       大家睇呢套戲千衹唔好當<2012>咁睇,因為冇乜大場面同特技,亦唔好諗住同 一樣有大量動作場面,成套戲多數係描述兩父子之間嘅感情,域高對妻子查理絲花朗(Charlize Theron)嘅掛念同埋域高個仔喺嗰個環境仲對人心存希望.戲內雖然有食人族,但係亦冇過份賣弄血腥,導演祗讚.
電影製造既氣氛好凄涼,到最後域高亦病死,至於個仔結局點?大家不妨買或租番黎睇.


        唔錯,可以一看!

Cargo --- 太空懸疑片

        < Cargo >係一套瑞士科幻片,但睇完之後覺得只係一套以太空做背景既懸疑片,你唔會見到荷里活式既科技,只係得幾個廠景同CG做既太空.

        故仔講未來地球唔住得人,要移民到一個叫「土衛五」嘅星球,後來經一輪抽絲剝蠶後發現「土衛五」原來只係一個虛擬世界，於是女主角千方百計要揭發佢.
        其實影片開頭拍得唔錯,凝造到太空冰冷嘅環境同孤獨嘅氣氛,有啲似Ridley Scott嘅異形.不過個編劇嘅功夫真係差,戲到中段已經知道邊個忠邊個奸,又冇驚嚇場面,跟住就要捱到尾.重有套戲講德文,好彩對白唔多,唔使追字幕.
        套戲亦有得意地方,片中嘅佈景或PC經常出現漢字,導演好似想講未來會係中國人嘅世界.
        好少睇到瑞士片,有時間睇下,不過唔好太大期望.

Legion 天間叛徒 --- 翻抄未來戰士

         < 天間叛徒 > 嗰故仔同<未來戰士>一樣咁制,不過兩個由未來嚟嘅人改由天堂嚟,同樣係一個負責救同一個負責殺嗰未出世嘅細路,因為嗰細路會影嚮人類嘅生死存亡.故仔冇乜好講,不過拍得唔錯,套戲雖然特技少而且場景多係沙漠,勝在冇乜泠場,可以一看.
         想講套戲嘅演員,飾演餐廳老闆嘅丹尼斯奎爾(Dennis Quaid)之前做<明日之後(The Day After Tomorrow)>比較多香港人識,唔講!另一個飾演天使米高嘅保羅貝坦尼(Paul Bettany)係一個性格演員,喺好多大片做配角,例如<達文西密碼(The Da Vinci Code)>、<銅場火壁(Firewall)>、<魔法天書(Inkheart)>、<軍天勇將 : 戰海豪情(MASTER & COMMANDER: FAR SIDE OF THE WORLD)>、又聲演<鐵甲奇俠(Iron Man)>既電腦管家Jarvis.今次做天使雖然有型有款,但電影俠最鍾意佢喺<達文西密碼>內白化病殺手Silas,比湯漢斯(Tom Hanks)更搶鏡,大家睇呢套戲時留意下.

錦衣衛 14 Blades --- 徐子珊搶鏡

        <錦衣衛>套戲冇乜點,如果你想睇打片,呢套戲可以比你痛痛快快兩個鐘,不過丹爺舞力弄劍總冇拳腳咁好睇.而且太小着墨喺錦衣衛呢嗰機關,放太多遍幅喺青龍逃亡之後.


        電影俠要講喺徐子珊係戲入面好搶鏡,佢做嗰個西域女子雖然對白唔多,但喺勝在眼神同表情搭夠,又要吊威也,又要同丹爺打,都幾辛苦.反而女主角趙微就冇乜表現,普普通通,可能嗰角色冇得比佢發揮,唔係佢嘅話是但揾個都差唔多.

錦衣衛主題曲MV《錦衣衛》

The Expendables --- 動作巨星大雜燴

< The Expendables >係一套講僱傭兵嘅動作片,差唔多集合哂八九十年代動作巨星:
史泰龍 Sylvester Stallone 編導演
積遜史達頓 Jason Statham 最好打同最當打嘅鬼佬演員
李連杰 Jet Li 唔使講都知
米奇洛基 Mickey Rourke 過氣型男
杜夫朗格 Dolph Lundgren 洛奇4嘅蘇聯佬
Eric Roberts 八九十年代拍過好多低成本動作片,同龍哥係炮彈專家係 (The Specialist)合作過
Steve Austin 摔角明星
布斯韋利士 Bruce Willis 客串
阿諾舒華辛力加 Arnold Schwarzenegger 客串
套戲有咁多人打,電影俠諗都會打餐懵,如果有埋尚格雲頓(Jean Claude Van Damme)就經典喇.
2010 暑假上畫

龍哥60幾歲人重可以操到咁fit,加埋tatoo,真係冇得頂!

Desperate Housewives 靚太唔易做 --- 5月5號明珠台播season 6

         靚太唔易做S5啱啱做完冇耐,S6會喺5月5號.Good!今次唔使等咁耐.

        上季尾Mike再婚,你估係Susan定Katherine?今次又會有新家庭加入,唔知又攪乜花臣?靚太fans大家傾吓.