布斯韋利士Bruce Willis新作< Kane & Lynch >暴力遊戲改編

       電影喺2010年3月開拍,2011年上映,布斯韋利士(Bruce Willis)新作< Kane & Lynch >改編自同名家用遊戲,布斯會做Kane角色,而另一角色Lynch會由奧斯卡影帝占美霍士(Jamie Foxx)主演.

       呢隻Game喺2007年出,雖然喺香港唔係咁勁,但喺外國就好hit,嚟緊有第二集出,DC Comics今年重會出漫畫,都可以幫套戲做勢.導演Simon Crane雖然第一次執導,但之前做開動作特技指導,今次一定落重彈药玩動作場面,布斯沉咗咁耐,今次大好機會翻身.

添布頓(Tim Burton)準備開拍池上遼一名作「舞」

          有消息指出怪雞導演添布頓(Tim Burton)正準備開拍日本殿堂級漫畫家池上遼一嘅名作「舞」.
       「舞」嘅故事內容講一個14歲少女身懷超能力,俾神秘組織「十三人眾」追捕嘅故事.其實漫畫嘅版權早係8年前俾Sony Family Films買咗,不過遲遲未開拍,而家公司本身嘅資金亦出現問題,所以將版權交俾添布頓.

        而家重係喺撰寫劇本嘅階段,如無意外會喺2011年開拍.
                                                        

不赦島 Shutter Island --- 劇情一般 里安納度個人表演

       <不赦島>係導演馬田史高西斯(Martin Scorsese)同里安納度狄卡比奧(Leonardo Dicaprio)第四次合作,之前嘅<無間道風雲(The Departed)>攞咗唔少獎,重有<娛樂大亨(The Aviator)>同<紐約風雲(Gangs of New York)>.
       電影俠最鍾意喺<紐約風雲>.至於<不赦島>掛起懸疑片牌頭,劇情只係一般,馬田史高西斯喺套戲前半段用咗唔少遍幅描述里安納度經常產生幻覺,心水清嘅觀眾都知道佢係黐線,後半段劇情發展已冇乜驚喜,剩低嘅只有睇里安納度個人表演.有之前喺無間道風雲嘅經驗,佢演精神分裂嘅角色絕對難唔到佢.
       其實套戲個背景都應該有得發揮 - 1952年二次大戰結束後,一個孤島,一間精神病院,一個退役嘅盟軍軍人調查一個失縱嘅精神病人,遇上一個納粹醫生.無奈最後馬田安排里安納度知道自己原來係黐線嘅,所以一切都唔使多作解釋,結局真令人失望.

       不過電影俠想考吓大家,最後果場戲里安納度有幾句對白 「哪個更糟?是行屍走肉地活,還是堂堂正正地死」,你話佢係再黐番定係唔想再面對現實而想死?

Predators 鐵血戰士S --- 官網啓動 官方海報曝光

        期待已久嘅Predators官方網頁已經成立,有三張官方海報有得睇,離上映日期愈嚟愈近,將會有更多資料曝光,有消息會第一時間同大家講.
                                                     http://www.predators-movie.com/

真人版宇宙飛龍GAIKING殺到埋身 !

       一班六、七十後嘅卡通迷一定睇過宇宙飛龍GAIKING(日本名大空魔龍),呢套經典卡通喺1977年日本播放.喺2010東京動漫展展示咗一段宇宙飛龍嘅預告,嗰段trailer用咗最新CG技術 —— Light Stage,相當逼真.而電影亦製作中,預計2011年底喺日本上映,跟住2012會全球公映.


       近幾年好多超級英雄片,玩巨型機械人嘅就好少,睇吓段trailer好有< Transformer >feel,套戲質素應該幾好.希望有好嘅票房,使到三一萬能俠、鉄甲萬能俠有機會出山.

2010東京動漫展

製作花蕠

           

The Unborn 破鏡凶靈 --- 加利奧文失敗之作

       加利奧文(Gary Oldman)係電影俠最欣賞嘅演員之一,由<這個殺手不太冷(Leon: The Professional)>、<吸血驚情四百年(Dracula)>、系列等等,雖然唔係套套擔正,但有佢喺度套戲生色不小.
       電影俠睇呢套戲亦因為有佢,不過都係客串性質,得幾場戲,咁都冇所謂.幣就幣在呢套戲實在太爛,雖然有<變形金剛(Transformers)>導演Michael Bay監制同<蝙蝠俠–黑夜之神(The Dark Knight)>編劇David S. Goyer坐陣,但係劇情老套冇高潮位,驚嚇血腥核突又唔夠,到尾段驅魔場面毫無驚喜,求其念下書就趕走隻鬼.加利奧文個角色根本冇得發揮,可能同編劇老友先拍.


        一句講哂,呢套係好爛既驅魔片!

異形前傳二部曲 --- 列尼史葛執導 2012上映

       異形(Alien)是列尼史葛(Ridley Scott)於1979執導嘅電影,呢套片可以講係驚悚片經典,列尼決定在2010年底開拍,以首集異形出現過嘅Space Jockey為主線,背景設定為首集30年前.戲入面會出現番Weyland公司老闆「主教」Charles Bishop Weyland,但就一定冇薜哥尼韋花(Sigourney Weaver),會有新女上場.
      而且電影會以新嘅3D技術拍攝黑暗嘅環境,不過電影俠要提醒列尼唔好因為要突出新拍攝技術而忽略電影本身.

                                                            Alien 1979 poster

The Space Jockey

The Concept of the SPACE JOCKEY

The Crazies 瘋殺禁區 --- 一解喪屍迷相思之苦

        < The Crazies 瘋殺禁區 >是重拍1973年喪屍大師George A. Romero同名電影,故仔講一個小镇啲水俾病毒感染,啲人飲咗就癲哂,見人就殺,主用一行幾人要避開班癲佬同軍方追殺.嚴格嚟講呢套唔係喪屍片,因為喪屍唔識用武器,唔識用槍同唔識講野,但呢班癲佬就識.
       套戲冇乜核突血腥鏡頭,之不過用上喪屍片公式,而且都拍得幾緊張,咁耐冇乜喪屍片睇,呢套都可以過到癮.
       鐘意睇喪屍片嘅你唔好錯過.

< The Crazies > 1973 Poster

Predators 鐵血戰士2010 --- 暑假上映

       電影俠是Predator嘅Fans,逢有Predator嘅戲必到戲院捧場.佢應該係除左Death Vader外,其中一位較重要歹角.因為Death Vader有星戰六部曲,佢都有五套(包括今年暑假嗰套),而且週邊商品多,又出comic,幫電影公司揾唔少錢.



        呢套係翻拍1987年阿諾舒華辛力加(Arnold Schwarzenegger)嗰套 .亦係最好睇嘅一集.不過今次揾影帝艾哲倫保迪(Adrien Brody)做,唔知佢有冇阿諾咁好抽.重有上次得一隻Predator,今次戲名多個「s」,睇嚟艾哲倫要一個打幾個.


       熱切期待!

Predator 1987