腐敗刑警(The Bad Lieutenant：Port of Call New Orleans) - 遊走正邪之間,尼古拉斯基治代表作

         故仔講尼古拉斯基治(Nicolas Cage)飾演警探Terence McDonagh有一次為救一名疑犯而整親腰骨,以致患上嚴重背痛,要靠吸毒嚟麻醉自己因而沉淪毒海,最後因為負担唔起要又偷又搶.另一方面亦因為一宗滅門慘案而疲於奔命,又要償還女友嘅欠債,整個人受到各方面嘅壓力.
        尼古拉斯基治將呢個角色發揮得淋漓盡展,因為背痛要側起一邊膊頭,生活壓力令到佢成日起黑起塊面又略帶邪氣,但同女友一齊又有天真溫柔嘅一面,角色立體,難分正邪,係佢近年代表作.
        不過結局就麻麻,突然間又破到案,又中波纜,又升職,女友又有咗,簡直係美好人生.如此結局就好似要將套戲草草埋尾,同成套電影格格不入.雖然話導演Werner Herzog係德國電影大師,但我就覺得尼古拉斯基治先係呢套片成功因素.